Ахбор

Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Федератсияи Русия муҳтарам Владимир Путин суҳбати телефонӣ анҷом доданд.

Сарвари давлати мо дар ибтидои суҳбат Владимир Путинро ба муносибати пирӯзиаш дар интихоботи президентии дар Федератсияи Русия доиргардида сидқан табрик гуфтанд.

Президенти Тоҷикистон ба Владимир Путин дар фаъолияти давлатиашон комёбиҳои нави рӯзафзун дар роҳи рушди босубот ва шукуфоии Русияи дӯст орзу намуданд.

Зимни суҳбат ҷонибҳо оид ба масъалаҳои муҳими ҳамкории Тоҷикистон ва Русия бо таваҷҷуҳ ба соҳаҳои тиҷоративу иқтисодии муносибатҳои ду кишвар табодули афкор намуданд.

Пешвои миллат ба Президенти Федератсияи Русия дар иртибот ба пирӯзиаш дар интихобот, инчунин, барқияи табрикотӣ ирсол намуданд.

Агентии миллии иттилоотии Тоҷикистон «Ховар» дар якҷоягӣ бо вазорату идораҳои дахлдори мамлакат, рӯзномаҳои давлатӣ ва  маҷаллаи «Бонувони Тоҷикистон» бо мақсади иҷрои банди 27-и ҷадвали баргузории ҷашну солгард, фестивалу намоиш, иду озмунҳои фарҳангию маърифатӣ ва анъанаҳои мардумӣ дар Ҷумҳурии Тоҷикистон барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмуни «Вассофи Ватан»-ро эълон  менамояд.

Мақсади асосии фестивал-озмун тарбияи эҳсоси ватандӯстӣ ва ифтихор аз Истиқлоли давлатӣ, эҳтирому муҳаббат ба Ватан ва расму оинҳои мардумӣ, дарёфти муаллифони боистеъдод, эҷодкор ва навовару бомаҳорат, тарғиб ва муаррифии дастовардҳои солҳои соҳибистиқлолӣ, таърихи миллати тоҷик ва фарзандони фарзонаи он дар сатҳи ҷумҳурӣ ва ҷаҳон, афзалияти Тоҷикистон дар арсаи байналмилалӣ, муаррифии табиати нотакрор, олами ҳайвоноту наботот, парандагон ва обҳои шифобахши он, инчунин ҳавасманд гардонидани онҳо мебошад.

Интихоби беҳтарин маводи насрӣ (мақола, ҳикоя, қисса ва ғайра), ролики таблиғотӣ, барнома ё филми муаллифӣ дар васфи Ватан, дастовардҳои миллӣ, табиати нотакрор ва мавзеъҳои сайёҳӣ дар як давр бо роҳи арзёбии маводи пешниҳодгардида аз ҷониби ҳакамони фестивал-озмун анҷом дода мешавад.

То соли 2037 Тоҷикистон ба мамлакати сабз ва пойтахти он –шаҳри Душанбе ба яке аз шаҳрҳои сабзтарин дар минтақаи Осиёи Марказӣ табдил дода мешавад. Чунин гуфта шуд дар конфронси илмӣ-амалии «Нақши шаҳрҳо дар татбиқи ташаббусҳои сабз: таҷрибаи Душанбе», ки имрӯз дар пойтахти Тоҷикистон –шаҳри Душанбе баргузор гардид.

Хабарнигори АМИТ «Ховар» иттилоъ медиҳад, ки конфронс бо ибтикори Мақомоти иҷроияи ҳокимияти давлатии шаҳри Душанбе дар иртибот ба эълон гардидани соли 2025- Соли байналмилалии ҳифзи пиряхҳо, 21 март- Рӯзи ҷаҳонии пиряхҳо, 22 март- Рӯзи ҷаҳонии об ва соли 2024- Соли маърифати экологӣ дар шаҳри Душанбе, инчунин идомаи ҷонибдории иқдоми байналмилалии Пешвои миллат муҳтарам Эмомалӣ Раҳмон доир ба масъалаҳои обу иқлим ва ташвиқу тарғиби ташаббусҳои байналмилалии Тоҷикистон гузаронида шуд.

Дар конфронс муовини Сарвазири Ҷумҳурии Тоҷикистон Сулаймон Зиёзода, роҳбарони вазорату идораҳои марбутаи мамлакат роҳбарияти шаҳри Душанбе, дастгоҳи Раиси шаҳр, раисони шаҳрҳои ҷумҳӯрӣ, олимону коршиносони масоили экологӣ, намояндагони созмонҳои байналмилалӣ ва корпусҳои дипломатии муқими Ҷумҳурии Тоҷикистон иштирок намуданд.

Конфронс нахуст бо намоиши аксҳо ва навор, ки таҷассумкунандаи паҳлуҳои алоҳидаи ҳифзи пиряхҳои Тоҷикистон мебошанд, оғоз ёфт.

Наврӯз ҷашни миллию мардумӣ ва таърихии мо аст, ки онро бо номи шоҳи Пешдодӣ Ҷамшед тавъам медонанд ва тибқи маълумот, ин ҷашн дар рӯзгори шоҳаншаҳии ӯ оғоз гардидааст. Мутмаин ҳастам, ки эҳёи ҷашни Наврӯз дар қарни бистуяк ва ҷаҳонӣ шудани он ҳамчун ҷашни Наврӯзи байналмилалӣ бо ном ва кору пайкори Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тавъам аст ва миллати мо меросбари ҳақиқии ин ҷашн ва дар асл миллати Наврӯз аст. Бинобар ин, Пешвои миллати моро метавон Пешвои миллати Наврӯз ном бурд.

Чунин нигоштааст академик Фарҳод Раҳимӣ дар мақолааш бахшида ба ин ҷашни миллии тоҷикон. 

— Инак сивусеюмин  соли Истиқлоли давлатӣ бомаром дар фазои сулҳу субот ва созандагию ободкориҳо идома дорад ва мардуми шарифи Тоҷикистон зери роҳбарии хирадмандонаи Президенти Ҷумҳурии Тоҷикистон муҳтарам Эмомалӣ Раҳмон зиндагии оромона ба сар мебарад ва ояндасозӣ менамояд. Давлати миллӣ дар руҳияи худшиносию худогоҳӣ, арҷгузорӣ ба таъриху фарҳангу тамаддуни дирӯзу имрӯзи инсонӣ шакл мегирад ва оламиён ин миллати куҳанбунёдро бо такя ба ташаббусҳои имрӯзаи Пешвояш мешиносанд, мепазиранд, бо он робитаҳои сиёсию иқтисодию фарҳангӣ барқарор менамоянд, то ки аз таъриху фарҳанги бузурги миллати тоҷик баҳравар гарданд ва аз он дар зиндагии рӯзмарра истифода баранд.