Ахбор

Имрӯз дар пойтахти мамлакат  таҳти раёсати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ҷаласаи навбатии Шурои Маҷлиси миллии Маҷлиси Олии Ҷумҳурии Тоҷикистон,  даъвати шашум баргузор гардид, ки тибқи рӯзнома дар он  39 масъала мавриди баррасӣ қарор дода шуд. Дар ин хусус АМИТ «Ховар» бо истинод ба Маҷлиси миллии Маҷлиси Олии Ҷумҳурии Тоҷикистон хабар медиҳад.

Дар ҷаласа қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», «Дар бораи масъулият барои таълиму тарбияи кӯдак», «Дар бораи Донишгоҳи миллии Тоҷикистон» ва «Дар бораи нишондиҳанда барои ҳисобҳо» дар шакли мукаммал баррасӣ карда шуданд.

18 июн бо ибтикори Сафорати Ҷумҳурии Тоҷикистон дар Подшоҳии Арабистони Саудӣ дар рӯзномаи байналмилаллии арабии «Аш- Шарқ ал-Авсат» (Ховари Миёна) мусоҳибаи арабшинос ва тарҷумони тоҷик, узви Иттифоқи нависандагони Тоҷикистон Нарзулло Назар ба нашр расид,ки  дар он доир ба  таърихи адабиёти тоҷику  форс, шеъри асилу оламшумули тоҷикӣ ва робитаҳои фарҳангию адабии тоҷикон бо ҷаҳони араб  маълумот манзур гардид. Дар ин хусус АМИТ «Ховар» бо истинод ба Сафорати Ҷумҳурии Тоҷикистон дар Подшоҳии Арабистони Саудӣ хабар медиҳад.

Дар мусоҳиба таъкид гардидааст, ки тоҷикон аз нажоди ориёӣ буда, қадимтарин мардуми асилу бумии  минтақаи Осиёи Марказӣ ба шумор мераванд ва дорои фарҳангу тамаддуни куҳан мебошанд.

Мусоҳиб асарҳои «Тоҷикон дар оинаи таърих»-и Президенти Ҷумҳурии Тоҷикистон муҳтарам Эмомалӣ Раҳмон ва «Тоҷикон»-и академик Бобоҷон Ғафуровро, ки ба забони арабӣ тарҷума ва нашр шудаанд, муаррифи  таъриху фарҳанги  тамаддунофари  тоҷик дар ҷаҳони араб арзёбӣ намудааст.

Зимни мусоҳиба дар бораи бунёдгузори адабиёти классикии тоҷик Абуабдуллоҳи Рудакӣ ва дигар абармардони назму насри тоҷик, ба монанди Камоли Хуҷандӣ, Садриддин Айнӣ, Ҷалол Икромӣ, Сотим Улуғзода ва дигарон  маълумот пешниҳод шудааст.

11 июн Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи Конфронси сеюми байналмилалӣ оид ба Даҳсолаи байналмилалии амал “Об барои рушди устувор, солҳои 2018-2028” Муовини Дабири кулли Созмони Милали Муттаҳид оид ба масъалаҳои иқтисодӣ ва иҷтимоӣ Ли Ҷунҳуаро ба ҳузур пазируфтанд.

Дар мулоқот масоили ҳамкории Ҷумҳурии Тоҷикистон бо Созмони Милали Муттаҳид ва ниҳодҳои он баррасӣ гардид.

“Ба туфайли ҳамкории босамари Тоҷикистону Созмони Милал, бахусус бо Дафтари Шумо, ташаббусҳои мо дар арсаи байналмилалӣ ҷонибдории васеъ пайдо карданд. Қабули даҳ қатъномаи марбут ба обу иқлим аз ҷониби Маҷмаи Умумӣ тасдиқи ин гуфтаҳост”, изҳор доштанд Президенти кишвар муҳтарам Эмомалӣ Раҳмон.

11 июн Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Конфронси сеюми байналмилалӣ оид ба Даҳсолаи байналмилалии амал “Об барои рушди устувор, солҳои 2018-2028” иштирок ва суханронӣ карданд.

Нахуст Сарвари давлат муҳтарам Эмомалӣ Раҳмон роҳбарони ҳайатҳои ҳукуматҳо ва ташкилоту созмонҳои бонуфузро ба Тоҷикистон хайрамақдам гуфта, ба кори конфронс барор орзу намуданд.

Президенти кишвар оид ба ташаббусҳои глобалии Тоҷикистон андешаронӣ карда, таъкид доштанд, ки “мо ҳама якҷо тавонистем, ки обро дар меҳвари гуфтушунидҳои глобалӣ оид ба рушд қарор дода, ҷомеаи ҷаҳониро атрофи ин мавзӯи бағоят муҳим муттаҳид созем”.

Пешвои миллат муҳтарам Эмомалӣ Раҳмон тадбирҳои то имрӯз дар ин самт анҷомёфтаро нокифоя дониста, барои дарёфти роҳҳои нави расидан ба ҳадафҳо бо пешниҳодҳо баромад намуданд.